Ұлы Жеңістің 80 жылдығы құтты болсын!

Ұлы Жеңістің 80 жылдығы құтты болсын!

     Биыл біз адамзат тарихындағы ең ауыр әрі ең маңызды оқиғалардың бірі – Екінші дүниежүзілік соғыстың аяқталып, Жеңістің туы желбірегеніне 80 жыл толуын атап өтудеміз. Бұл күн – жанқияр ерлік пен отансүйгіштіктің, ел үшін етігімен су кешкен ерлердің рухына тағзым ететін қасиетті мереке.

    Ұлы Жеңіс – тек майдан даласындағы жеңіс емес, ол тылдағы еңбеккерлердің төккен тері мен ер жүрек жауынгерлердің қанымен келген тарихи нәтиже. Осындай ұлы жеңіске біздің ата-бабаларымыз зор үлес қосты. Қазақ даласынан 1 миллионнан астам азамат соғысқа аттанып, олардың тең жартысынан астамы майдан даласында ерлікпен қаза тапты. Мыңдаған қазақ сарбаздары батырлық көрсетіп, орден-медальдармен марапатталды.

    Осы жолда ерекше көзге түскен ерлердің бірі – Кеңес Одағының Батыры, даңқты қолбасшы, жазушы, халық қаһарманы Бауыржан Момышұлы. Ол Мәскеу түбіндегі шешуші шайқаста батальонды басқарып, жауға қарсы жан аямай күресті. Бауыржан Момышұлы – тек майдангер ғана емес, ұлт рухын көтерген дана тұлға, әскери тәртіп пен ұлттық рухты ұштастыра білген кемеңгер командир. Оның ерлігі мен нақылға айналған ұлағатты сөздері бүгінгі ұрпаққа өшпес өнеге.

    Жеңіс – бізге оңай келген жоқ. Сондықтан бұл тарихи күн – ерлік пен елдіктің, бірлік пен тұрақтылықтың маңызын ұғындыратын ұлы дата. Ерлікке тағзым – елге қызмет етудің жарқын үлгісі. Біз, бүгінгі ұрпақ, бейбіт өмір сыйлаған батыр бабаларымыздың даңқты жолын мәңгі жадымызда ұстап, олардың рухына лайық болуға тиіспіз.

    Ұлы Жеңістің 80 жылдығы құтты болсын! Егемен еліміз аман, халқымыз тыныш, ұрпағымыз ерлікті бағалай білетін саналы болсын!